tenpo ni

tenpo ni la nasin Juniko UCSUR li kepeken. kulupu mute li pali e ilo li kepeken e ona. linja mute pi sitelen pona li kepeken nasin UCSUR. sitelen mute li kepeken nasin UCSUR. lipu kule li ni kin.

kulupu pi toki pona la ni li pona mute a! taso, kulupu ante li sona ala e nasin UCSUR. sina pana e sitelen UCSUR tawa kulupu ante la ona li lukin e sitelen leko taso.

kina la sina wile lukin e sitelen UCSUR la sina o pana sona tawa ilo sina. ona li jo ala e sona pi nasin UCSUR tan open ona.

pali Juniko

kulupu sona li lukin e ike pi sona ala ni. ni la ona li open pali e ni: ona li pana e sona pi sitelen pona tawa nasin Juniko. sitelen pona li lon nasin Juniko la ilo ale li ken kama sona e ona a! jan Lepeka li open e pali ni. (ona li lawa e nasin Juniko UCSUR.) ona li sona mute e nasin Juniko li toki tawa kulupu Juniko. sona ona li suli tawa pali pi kulupu pali a! tenpo ni la kulupu pali li ni: jan Lepeka, akesi Jan (mi a!), ijo Alison, jan Itan, lipamanka, jan Pensa, jan Juwan, jan Ke Tami, kala Asi, jan Tepo, jan Kokan Ato, nanpa Tonpite.

ijo mute lon kulupu ni li sona e:

• pali ilo. ilo li wile la ona li ken lon e ona!
• pali pi nasin linja. ona li sona e wile pi nasin linja li ken pali e linja sin!
• pali toki. sona pi nasin toki li wile la ona li ken alasa sona kepeken nasin pona!

sona mute ni la kulupu ni li ken pali e lipu pona tawa kulupu lawa Juniko. mi sitelen lon open pi sike suno ni. tenpo wile pana li pini pi sike suno ni.

sina wile lukin e pali pi kulupu ni la ona li lon ni.

nasin alasa sona

kulupu pali li wile e kule sona tu li pali alasa e ona.

kule nanpa wan: sona toki

jan li toki e ijo la ni li sona toki. ona li ken pana sona e pilin. taso ona li ken ala pana sona pona e pali.

alasa sona la jan mute li toki e ni: "mi kepeken e nimi mute pi luka tu tu." taso, jan mute ala li kepeken sitelen ni. ni li tan wile tawa sona pali.

taso, sona toki li pona tawa ijo ante.

kule nanpa tu: sona pali

jan li pali e ijo la ni li sona pali. ona li ken pana sona e pali. taso ona li ken ala pana sona pona e pilin.

kulupu pali li jo ala e sona ni. ni la ona li alasa sona e nasin ni.

nanpa wan la kulupu pali li wile e ni: kulupu mute o kepeken sitelen pona! pali mute li lon la sona pali mute li lon kin.

nanpa tu la kulupu pali li open alasa e sitelen pona kepeken tan ma ale.

nanpa tu wan la kulupu pali li pali e tomo sona pi sitelen pona alasa. ni la sona pi ijo ni ale li lon tomo wan.

tenpo kama

nasin kama li utala li pali suli a! taso pini ona li pona e utala e pali suli. ilo ale li ken sona e toki pona la pona ale li kama suli.