sina sona ala sona e ni: jan mute li kepeken nasin tenpo mute? ma Juwese la mi kepeken nasin tenpo pi jan Kekoli, taso ma en jan ale li kepeken ala nasin ni.

open la mi o toki e ni: nasin tenpo li seme? n, o lukin e ni: mi jan ma. mi lukin moku e kasi, taso mi sona ala e ni: tenpo seme la mi o pana e kasi lili lon ma? mi wile ala e ni: lete li kama li moli e kasi. ni la mi o nanpa e tenpo sike. mi ken kama sona e ni: tenpo seme la lete li kama? tenpo seme la seli?

nasin mute li lon tawa nanpa ni. jan wan li wile sona e ni: suno li kama seli li kama lete lon tenpo seme? jan ante li lukin sona e ni: mun li kama suli li kama weka lon tenpo seme? jan ante ante li alasa e sona ni: jan lawa li jo e tenpo sike seme? jan ale en ma ale li kepeken nasin tenpo mute.

ken la, nasin tenpo li nasa lili. tenpo suli la nasin tenpo li kama tan ni: jan wan li pali lon ma wan, jan ante li ante lon ma ante, tenpo suli li tawa la jan li awen kepeken nasin tenpo li lukin e ni: ona li kama pakala, la ona li ante li pona e ona. ni la nasin tenpo li kama nasa lili. nasa ni la jan mute li wile pali e nasin tenpo sin pona. mi toki lon wile ante ni.

open la mi toki lon nasin tenpo sin ni: jan pi ma Kanse li pali e ona lon tenpo ni: jan pi ma Kanse li weka e jan lawa sewi ona. ona li wile e ni: jan ale li ken kepeken nasin tenpo pona. nasin tenpo ni la nasin sewi en ijo nasa o weka. ona la jan li nanpa e tenpo la ona o wile ala e wawa nanpa suli. jan pi ma Kanse lon tenpo ni la, nanpa ni li pona mute a: luka luka. ona li wile e ni: jan li ken nanpa e tenpo kepeken nanpa ni.

ni la ona li pali e ni: jan sona o toki o alasa e nasin tenpo pona. jan Sipe Kome (Gilbert Romme) li lawa e kulupu ni pi jan sona li toki e nasin sin ona tawa kulupu lawa sin pi ma Kanse.

nasin tenpo sin la, tenpo sike li open lon tenpo suno ni: tenpo suno en tenpo pimeja li sama la tenpo suno li kama lili. tenpo suno ni li tenpo open pi tenpo sike li tenpo open pi tenpo pi kasi kule. ni li open pi tenpo suno sin tan ni: tenpo suno ni la jan pi ma Kanse li weka e jan lawa ona. tenpo sike nanpa wan li ni: jan pi ma Kanse li weka e jan lawa ona lon ona.

nasin tenpo sin la tenpo sike li jo e kipisi luka luka tu (12). kipisi ale li sama tenpo mun, taso ona li jo e tenpo suno mute luka luka (30). tenpo mun ale li jo e tenpo esun tu wan (3). tenpo esun ni li jo e tenpo suno luka luka (10). tenpo suno ni li jo e nimi sama ni: “tenpo suno nanpa wan”, “tenpo suno nanpa tu”…. ni la jan li ken sona e ni: tenpo mun ale la, tenpo suno nanpa luka en nanpa luka luka luka en nanpa mute luka li jo e nimi “tenpo suno nanpa luka” lon tenpo esun.

sina wawa lon nasin nanpa la sina lukin e ni: nasin tenpo li jo e tenpo mun luka luka tu (12). tenpo mun li jo e tenpo esun tu wan (3). tenpo esun li jo e tenpo suno luka luka (10). ni li sama nanpa ale ale ale mute mute mute (360). taso tenpo sike li jo e tenpo suno ale ale ale mute mute mute luka (365)! ni la, kulupu pali pi nasin tenpo ni li pali e ni: tenpo sike o jo e tenpo suno luka (5) anu luka wan (6) namako. tenpo suno namako ni li lon tenpo mun ala li lon tenpo esun ala, taso ona o lon tenpo sike tawa ni: jan li ken nanpa pona e kama seli suno e kama lete suno.

tenpo mun en tenpo suno ale li jo e nimi. nimi ni li kama tan jan Pape Ekansin (Fabre d’Églantine). ona li pana e nimi namako tawa ni: nasin tenpo li pona tawa lawa jan la ona o pona tawa pilin jan kin. nasin tenpo pi nasin sewi Kisijan la tenpo suno ale li jo e nimi tan jan pona sewi pi tenpo pini. kin la tenpo mun ale li jo e nimi tan jan sewi pi ma Loma tan jan lawa pi ma Loma tan nasin nanpa pi ma Loma. ni la jan Pape li pilin e ni: tenpo ale li jo e sitelen e pilin.

jan Pape li wile ala e nasin sewi la ona li weka e nimi ni tan nasin tenpo sin. taso ona li pilin e ni: nasin tenpo li lipu tawa jan tan ni: jan li lukin e ona lon tenpo mute. ni la ona o pana e sona pona tawa jan o jo e nimi pona lon ona. jan Pape la sona pona ni li sona ma li sona kasi li sona soweli. ni la ona li pana e nimi sama ni tawa tenpo mun:

• tenpo mun nanpa esun
• tenpo mun nanpa kon telo walo
• tenpo mun nanpa lete
• tenpo mun nanpa ko walo lete
• tenpo mun nanpa telo sewi
• tenpo mun nanpa kon tawa
• tenpo mun nanpa kasi sin
• tenpo mun nanpa kasi suwi
• tenpo mun nanpa ma kasi
• tenpo mun nanpa pan
• tenpo mun nanpa seli
• tenpo mun nanpa kili

o awen sona e ni: nasin tenpo ni la tenpo sike li open lon pini pi tenpo seli. ni la sina ken sona e ni: tenpo mun ale la, seme li kama lon jan pi ma Kanse?

kin la, tenpo suno ale pi tenpo sike li jo e nimi. tenpo esun la tenpo suno nanpa luka ale li jo e nimi soweli. tenpo esun la tenpo suno nanpa luka luka li jo e nimi ilo. tenpo suno ante ale li jo e nimi kili anu kasi. jan Pape li lukin e ni: tenpo seme la soweli seme en kasi seme en kili seme en ilo seme li suli? tenpo ni la tenpo suno o jo e nimi pi ijo suli ni. ni la jan li ken lukin e lipu pi nasin tenpo li ken sona e ni: ijo seme li suli lon tenpo ni? mi o sona o lukin e seme lon tenpo ni?

lon la, ijo mute tan nasin tenpo ni li sin ala: jan pi ma tomo Atena li jo e tenpo esun pi tenpo suno luka luka. jan pi ma Masu li pana e tenpo suno namako luka tawa tenpo sike. jan mute li open e tenpo sike lon tenpo suno ni: suno en pimeja li sama la tenpo suno li kama lili. jan mute ante li nanpa e tenpo sike tan open pi nasin lawa sin ona.

pini la, nasin tenpo ni li awen ala. jan mute li wile ala kama sona e nasin tenpo sin. jan ante li pilin ike tan weka pi nasin sewi. jan mute mute li pilin e ni: tenpo suno luka tu tu li suli mute tawa pali. nasin tenpo sin ala pi ma Kanse la jan li pali lon tenpo suno luka wan li lape lon tenpo suno wan. ni la tenpo suno luka tu tu li suli pilin tawa jan pi ma Kanse. tenpo sike luka luka tu tu pi nasin nanpa sin la nasin tenpo ni li pini.

ni la sina sona e nasin tenpo pi kamalawala Kanse. sina pilin e seme tan ona? lon la tenpo esun li ken suli ike, taso pilin mi la nimi pi tenpo suno ale li suwi. kin la, tenpo mun ale li jo e mute sama pi tenpo suno la pona; kin la, sina sona e nanpa pi tenpo suno la sina sona e nanpa ona lon tenpo mun e nanpa ona lon tenpo esun. ijo nanpa tu ni li awen lon poka li ante ala. ni li ken pona mute. lipu kama la mi toki lon nasin tenpo ante; o lukin e sitelen kama ni!

lipu ante

lipu “nasin tenpo pi lawa jan” tan lipu Wikipesija https://fr.wikipedia.org/wiki/Calendrier_r%C3%A9publicain lipu pi jan Pape Ekansin https://gallica.bnf.fr/ark:/12148/bpt6k48746z/f3.image.zoom lipu pi jan Sipe Kome https://gallica.bnf.fr/ark:/12148/bpt6k487479/f3.image.zoom