(mi jan sona akesi ala. mi sitelen musi taso.)

akesi mute li lon. suno ni la mi wile toki lon akesi pi ante kule.

jan mute li sona e ni: selo pi akesi ni li ken ante e kule ona. nasin seme la kule selo li kama ante?

sina kepeken ilo lukin wawa la sina ken lukin pona e ijo pi lili mute. seme li lili mute lon selo kule pi akesi ni? jan sona li ken lukin e leko lipu mute pi lili mute. selo akesi la leko lipu lili li lon poka pi leko lipu lili ante li jasima e suno. leko lipu mute li lon poka anu weka, la leko ni li jasima e suno pi kule ante. nasin ni la akesi li ken ante e kule pi selo ona.

tan seme la akesi li wile ante e kule ona? jan mute li pilin e ni: akesi ni li wile weka tan lukin, li wile jo e len. ni li lon, taso ante kule li tan ijo suli ante kin. ante kule li toki e pilin akesi e wile akesi. akesi li wile utala e akesi ante, la selo li kama walo. akesi li pilin anpa, la selo li kama pimeja. pilin lape la laso. pilin wawa la jelo. kule ante li lon. kule li toki.

sijelo pi akesi kule li jo e seme? luka en noka li jo e kipisi tu. kipisi luka wan li jo e palisa luka tu. kipisi luka ante li jo e tu wan. oko pi akesi kule li nasa mute. akesi li ken lukin e ijo tu lon tenpo sama! oko wan li lukin e ijo nanpa wan. oko ante li lukin e ijo nanpa tu. akesi li ken kute, taso ona li jo ala e lupa kute.

akesi pi ante kule li moku e pipi. palisa uta pi akesi ni li suli mute a, li ilo alasa wawa. palisa uta li tawa wawa, li jo e poki lili lon pini, li lanpan e pipi.

akesi lili pi ante kule li kama tan seme? akesi mije en akesi meli li ken unpa. mije li wile unpa la ona li tawa mute e lawa. anpa lawa li kama loje. mije li pona tawa meli, la unpa li kama. meli li pana e sike mama. akesi lili li lon insa sike. akesi tonsi kin li ken lon.

akesi pi ante kule li ken mu. tenpo ni la sina sona.

(jan Lilija li pali e sitelen lukin.)

jan pali pi lipu ni li wile e ni: lipu CC0 li lawa e toki ni.