lipu kule

ilo alasa

o kama sitelen e lipu kule!

musi li weka lawa

tan waso Wilo 
lipu ni li jo e nimi 223

lawa li wile ala e musi sina. sina sona e lon ni. lawa pali li wile e pali taso sina. sina musi la sina pali ala la ona li wile e pini musi sina. lawa sona li wile e sina sona taso. sina musi la sina kama sona ala la ona li wile e pini musi sina.

lawa li ken e musi lili a. lawa sona la sina ken musi li ken moku lon tenpo lili! lawa pali la sina ken musi li ken moku lili! musi ni li ike tawa lawa. ona li ken e ni tan nasin lon taso. sina ken ala pali mute lon tenpo ale la lawa li ken e musi lili tawa wawa pali.

ni li ike a! seme o kama? mi la musi mute o kama. o musi kalama lon tenpo pali, o musi tawa lon tenpo sona, o musi lon tenpo ale. sina ken musi la o musi wawa o musi ale. musi sina li pali suli la o musi ni. musi sina la sina kama sona la o musi ni. musi o wile sina taso. musi sina o weka e wawa ona.

lawa li lukin poki e musi sina. ni li musi tawa mi tan wawa musi. ona li ken ala lawa lon e musi. ni la o musi sina la sina weka e lawa.