tenpo sike 1990 la ilo Ojase nanpa wan (Voyager 1) li pali e sitelen ni tan wile pi jan Ka Sekan (Carl Sagan). jan Ka Sekan li jan pi sona mun li jan pi sitelen lipu. tenpo pali pi sitelen ni la ilo Ojase nanpa wan li weka mute mute tan ma jan. sitelen ni la ma jan li sike lili lili walo lon linja suno.
nimi pi sitelen ni li “sike lili laso walo” (“the Pale Blue Dot”). jan Sekan li toki insa pona e suli pi sitelen ni. tenpo sike 1994 la jan Sekan li toki e ni lon lipu ona pi nimi sama (Pale Blue Dot: A Vision of the Human Future in Space, p. 6):
- o lukin sin e sike lili ni. ona li ma ni. ona li ma pi mi ale. ona li mi ale.
- lon ona la jan pona sina ale
- en jan ale pi sona sina
- en jan ale lon kulupu sina
- en jan lon ale li lon.
pilin pona jan ale - en pilin ike jan ale
- en nasin sewi mute
- en nasin wile mute
- en nasin esun mute
- en jan alasa ale
- en jan wawa ale
- en jan ale pi wawa ala
- en jan ale pi mama kulupu
- en jan ale pi pakala kulupu
- en jan lawa ale
- en jan anpa ale
- en jan tu ale pi olin sin
- en mama ale pi jan lili
- en jan lili wile ale
- en mama ale pi ilo sin
- en jan alasa ale pi ma sin
- en jan ale pi pana nasin
- en jan lawa ike ale
- en jan ale lon sona kulupu suli
- en jan lawa ale pi “wawa ale”
- en jan ale pi pona sewi
- en jan ale pi pakala ike
- li lon wan lili pi ko kon lon linja suno.
ale la ma jan li lili mute mute. o sitelen insa e ni: jan lawa utala mute li kama e nasin telo loje suli tan ni: tenpo lili la ona li ken kama lawa lon kipisi pi sike lili. o sitelen insa e ni: jan lon kipisi wan li pana mute e ike mute tawa jan pi ante lili lon kipisi ante. tenpo mute la jan li sona ike e jan ante. jan li wile moli mute e jan ante. ona li pilin utala wawa.
sike lili walo ni li weka e pilin suli e pilin lawa tan jan ale. ma mi li wan taso lon pimeja suli ale. lon pimeja ni la mi ale li sona ala e ni: tenpo kama la ijo ante li pona ala pona e mi ale?
kulupu sona jan pi tenpo lon la ma jan taso li jo e kasi e soko e pipi e kala e soweli. tenpo lili kama la jan ale li ken ala tawa mun ma ante. jan pi mute lili li ken tawa mun ma ante. taso tenpo lili kama la jan li ken ala tomo e mun ante. ni li ken pona anu ken ike tawa sina. taso tenpo lon la jan ale li lon ma jan taso.
toki ni li lon: sona mun li weka e pilin suli li pona e jan. sitelen weka ni pi ma lili mi li pana lukin e pakala pi pilin suli jan tawa mi ale. mi la ona li suli e ni: mi ale o pana e pona tawa jan ante, o awen e sike lili laso walo. ma mama la mi ale li sona e ona taso.