tenpo kama la, mi wile ala moli. mi wile awen lon tenpo ale.

(nimi pi pu ala: monsuta, misikeke, majuna)

sina o sona e ni: mi toki musi e moli e ijo ante ike. mi wile e ni: sitelen ni li musi. taso, o lukin e pilin sina.

pilin

ken la, sina toki e ni: “taso, jan Api o, jan pi moli ala li pilin ike, li jo ala e jan pona e jan olin e nasin. ona li wile moli a!” taso, ni li lon ala tawa mi. ni li lon musi taso.

mi kama jan pi moli ala la, mi pilin pona tan seme?

nasin mi li ni: mi jo ala e jan. jan li ken kama tawa mi. jan li ken weka tan mi. jan li wile awen lon poka mi la, mi en ona li sona ala li lawa ala e tenpo kama. jan li weka la, mi pilin ike. taso, tenpo ale la, pilin mi li kama pona tan ni: pilin ike li ike ala. jan pona pini mi li kama pona e mi. jan pona sin li ken kama jan pona pini. ni li ike ala. jan olin li sama.

…kin la, mi wan taso ala. jan ante li wile kin e ni. sina wile ala wile kama jan pi moli ala kin? ken la, mi ale li ken kama!

tan nasin seme?

ken la, sina toki e ni: “taso, jan Api o! sina jan. mi ale li jan! jan ale li moli. sina kama jan pi moli ala tan nasin seme?” ken la, nasin mute li kama… lon tenpo kama.

monsuta Wanpaja (Vampire) li lon ala. mi wile e nasin ante tan ni.

nasin pi tenpo kama li tu (tawa mi): sijelo pi kiwen wawa en nasin misikeke ale. (kin la, jan li ken pana e lawa ona lon insa pi poki wawa. taso, poki wawa li ike li awen ala.)

nanpa wan: tenpo ni la, jan li ken pona e noka e luka e kute e oko e ijo ante, tan kiwen wawa! ona li kama sin sama! sina weka e noka sina, taso sina jo e noka pi kiwen wawa la, sina ken tawa kepeken noka! luka pi kiwen wawa li palisa taso ala. jan li ken kepeken e ona tawa pali mute! oko pi kiwen wawa li pona lili. taso, ona pi pona mute li kama!

ken la, tenpo kama la, sijelo anu lawa li kama kiwen wawa. ken la, sijelo jan li ken kama sin lon tenpo mute. jan li ken moli ala lon tenpo sike mute! ni li pona tawa mi.

nanpa tu: tenpo ni la, sijelo jan li kama ike tan pipi lili anu ijo ante lon insa. sijelo jan li ken pakala. tenpo mute la, jan misikeke li ken pona e ni. tenpo mute la, ona li ken ala. taso, jan pi sona alasa misikeke li kama sona e misikeke sin. ni la, pali pi jan misikeke li kama pona mute!

ken la, tenpo kama la, jan misikeke li ken pona e ale. ken la, ona li ken pona e ike Kansa. ken la, ona li ken pona e majuna! jan li ken moli ala lon tenpo sike mute! ni li pona tawa mi.

nasin mani

ken la, sina toki e ni: “taso, jan Api o! jan pi mani ale li lon. jan ante li ken ala jo e ni tan ona!” ni li… lon. nasin mani li lon la, jan mute li ken ala kama e jan pi moli ala.

tan ni la…

o moku e jan pi mani ale! a a a!