tonsi li seme? nimi ‘tonsi’ la, kepeken tu wan li lon. kepeken nanpa wan la, tonsi li mije ala li meli ala. kepeken nanpa tu la, kon pi nimi tonsi li ni: jan li mije tawa meli, anu jan li meli tawa mije, anu jan li meli anu mije tawa tonsi. kepeken nanpa tu wan la, kon pi nimi tonsi li ni; jan anu ijo li lukin meli ala li lukin mije ala.

kulupu pi toki pona la, jan tonsi mute li lon. ona mute li pilin e ni: nimi ‘tonsi’ li nimi pona a. ona li kepeken e nimi ni. jan mute ante li toki e ni: “mi jan tonsi” anu “mi tonsi meli” anu “mi jan mije tonsi” anu “mi tonsi” anu nasin mute ante.

pilin ante li ni: “toki pona li toki lili. o suli ala e ona. mi wile ala e nimi ‘tonsi’.”

taso sina weka e nimi ‘tonsi’ la, jan tonsi li ken ala toki pona e kon ona. ona o toki e ni: “mi meli ala. mi mije ala. kon mi li ante” anu “mi meli. taso tenpo pini la, mi mije” anu toki suli ante.

nasin ante ni li suli li pilin pona ala tawa jan tonsi mute. mi jan tonsi. mi wile toki e kon mi la, mi wile ala toki e toki suli ni.

kulupu li toki e seme?

mi pana e lipu tawa kulupu pi toki pona. lipu li toki e ni: “nimi ‘tonsi’ la, pilin sina li seme?”. jan pi kulupu ni li pana e pilin ona tawa mi. ona li lon ma pona pi toki pona, lon ilo Siko, lon ilo pi lipu sinpin, lon ilo Telekan, lon ilo Wesi.

jan Wilo li toki e ni: “mi tonsi. lon la, kule mi li telo. lon la, lawa mi la, pilin mi la, nimi ‘tonsi’ li pona mute.” kulupu Aponi li toki e ni: “mi tonsi. mi wile e nimi tawa mi. tu kon li ike. mute kon li pona.” jan tonsi mute li toki e pilin sama.

jan wan li wile ala pana e nimi ona tawa mi. ona li sitelen e ni: “toki pona li wile e nimi ‘meli’ anu ‘mije’ la toki pona li wile e nimi ‘tonsi’.” jan mute li toki e toki pi kon sama. kili Apu li toki e ni; “pilin mi la nimi ‘tonsi’ li suli. jan tonsi li kepeken e ona tan ni: ona li mije ala li meli ala.” jan Eva li toki e ni: “mi ale o kepeken e nimi ‘tonsi’.” (mi ante e toki pi jan Eva tan toki Inli).

jan Kaja li toki e ni: “nimi li pona tawa mi. ona en nimi en nimi li suli sama. taso, tenpo lili la mi toki kepeken nimi tu wan ni. tenpo mute la mi toki taso e nimi .”

ante lili la, jan Salin li toki e ni: “mi mije ala li meli ala, mi toki ala e nimi ‘tonsi’. [taso] nasin mute li pona tawa mi. mi wile e ni: toki pona li pona tawa kulupu kule. mi wile pana e pilin pona tawa jan ante.” jan li pana ala e nimi ona tawa mi. ona li toki e ni: “mi kepeken ala ona. mi sona e ni: nimi ni li pona tawa jan mute. ona li kepeken ona, la ni li ike ala tawa mi. taso tawa mi la, ona li ike.”

ante mute la, jan pi mute lili li toki e ni: “mi kama sona e toki pona tan ni: mi wile ala kama sona e nimi mute. o pali ala e nimi sin!” en “nimi pi pu ala anu tenpo pini li nimi ala tawa mi.”

jan Sonja li mama pi toki pona. ona li toki e ni: "nimi tonsi li kama tan kulupu. mi pilin e ni: nimi tonsi li pona mute."

toki pini

sitelen ni li toki e pilin mi e pilin kulupu. mi la, nimi ‘tonsi’ li pona mute. jan nanpa lili taso la, nimi ‘tonsi’ li ike. taso jan nanpa mute la, ona li pona.

toki pona li toki pona. ni la, o pona tawa jan tonsi. o pona tawa jan ale.